TRASPASO (OVERDRACHT)
Kiko ta un traspaso?
Por papia di traspaso di derechi di èrfpagt den kaso ku hasi e traspaso via di notario, sin intermediashon di Domeinbeheer.
Dikon ta hasi traspaso di derechi di èrfpagt?
Si akaso bo ta bende bo kas kual ta trahá riba un tereno di èrfpagt, bo mester hasi traspaso di bo derechi di èrfpagt pa e doño nobo. E traspaso mester sosodé semper via di notario. Traspaso di un derechi di èrfpagt por sosodé solamente na momentu ku e bibienda riba e parsela en kuestion ta kla i habitabel. Notario ta kontrolá si e bendedó ta e persona ku derechi hurídiko di e parsela di èrfpagt i si ta pèrmití pa bende esaki. Den e kaso aki ta chèk por ehèmpel si e bendedó a paga tur kanòn di èrfpagt i impuesto di asuntu inmóbil. E notario ta sòru pa registrashon di e parsela riba nòmber di e kumpradó na Kadaster.Na momentu di e traspaso via di notario, e kondishonnan di e derechi di èrfpagt original ta keda na vigor. E persona ku derechi di èrfpagt (bieu) ta responsabel pa e kanòn di èrfpagt te na momentu di e siguiente fecha di vensementu. Kuminsando for di e fecha aki e persona ku derechi di èrfpagt nobo mester paga e kanòn di èrfpagt.
Ki ora Domeinbeheer ta intermediá?
Domeinbeheer ta intermediá den un proseso di traspaso na momentu ku e kas/ konstrukshon ku e persona ku derechi di èrfpagt kier traspasá no tin dak ku bentana. Na momentu ku kana e kaminda ofisial i legal di benta via di notario, notario lo no hasi e traspaso, sino manda e bendedó Domeinbeheer pa pidi e pèrmit nesesario pa por hasi e traspaso. Domeinbeheer na su turno ta evaluá e petishon i seguidamente tuma un desishon. Si Domeinbeheer bai di akuerdo ku e petishon, e bendedó ta risibí un dekreto ministerial serka Domeinbeheer pa e bai notario kun’é i finalisá e proseso di traspaso.
Kiko ta e kostonan?
Por lo general e kostonan ta bai pa e kumpradó den e terminologia ‘kostonan di kumpradó’. En prinsipio e kumpradó mester paga e kostonan na momentu di traspaso.
Ta trata di e siguiente kostonan:
• impuesto di traspaso
• kostonan di Kadaster
• stampia
• kostonan di notario
PREGUNTANAN FREKUENTE:
Mi por kumpra un konstrukshon riba parsela di èrfpagt sin intermediashon di Notario?
Nò, e benta mester sosodé semper via di Notario.
Mi por kumpra un parsela di èrfpagt bashí
Nò, no por bende ni kumpra un parsela di èrfpagt bashí.
Kiko ta pasa ku mi petishon pa kavel di èrfpagt riba lista di espera di Domeinbeheer, si mi kumpra un parsela di èrfpagt?
Domeinbeheer ta kita bo for di riba lista di espera.
Spletsmentu
Nò, e benta mester sosodé semper via di Notario.
Kiko ta spletsmentu?
Si akaso bo tin un parsela grandi den èrfpagt òf hür, bo por hasi un petishon pa spletsmentu di e parsela. Un petishon pa splets parsela ta enserá ku for di un tereno ta saka mas parsela. No ta tur parsela por bin na remarke pa spletsmentu; aprobashon di un petishon pa spletsmentu ta dependé entre otro di e grandura di e parsela i e motibu pa kua ta hasi e petishon pa spletsmentu.
Ta hasi petishon pa spletsmentu di un parsela den kuadro di:
• Traspaso di tereno
• Kambio di un parti di tereno di hür den èrfpagt
• Kambio di destinashon
Despues di spletsmentu ta originá parsela nobo. Kada parsela tin su propio indikashon di parsela ku su propio liña di separashon nobo.