Departamentunan

Domeinbeheer tin e departamentu di Emishon, kual ta e departamentu ku ta responsabel pa emishon di tereno di gobièrnu pa metanan di bibienda, komersial, industrial, turístiko i agrario.

E departamentu di Maneho Finansiero Ekonómiko ta enkargá ku e aspektonan finansiero di Domeinbeheer, kual ta enserá kobransa di èrfpagt òf hür i maneho finansiero atministrativo di tereno, awanan teritorial i edifisionan di gobièrnu emití.

Den e departamentu di Desaroyo di Bien Inmóbil tin dos sekshon; sekshon Desaroyo di tereno i sekshon Maneho di edifiso. E sekshon di Desaroyo di Tereno ta okupá ku desaroyonan di proyektonan grandi ku ta na benefisio di barionan i pueblo di Kòrsou en general. E departamentu aki ta desaroyá entre otro Áreanan di Rekreashon i Deporte i plannan maestro komersial, kual tin un impakto positivo riba ekonomia di Kòrsou. E sekshon di Maneho di edifisio tin e tarea di hasi kontròl i mantenshon di edifisionan di gobièrnu miéntras ku nan no ta den uzo.

Finalmente Domeinbeheer tin un Departamentu di Okupashon Ilegal & Mantenshon di Òrdu. Esaki ta e departamentu ku ta tuma medida di òrdu den kaso di okupashon ilegal di tereno di Gobièrnu. Alabes, e departamentu aki ta evaluá kasonan eksistente i wak te kon leu por formalisá a base di lei, regulashon i maneho.