Pregunta i Kontesta

SERVISIO

1. Kiko mi mester hasi pa mi por yega na un tereno di Gobièrnu?

Ora tin tereno disponibel, Gobièrnu ta hasi posibel pa yena un inskripshon por bini na remarke pa un tereno. Pa inskripshon tin 3 kondishon:

  • E persona mester ta inskribí na Kòrsou?
  • e persona mester tin por lo ménos 18 aña di edat
  • e persona no por ta doño di un parsela, ni e no por tin parsela den èrfpagt òf di hür

Mi tin un tereno, pero mi ke entregá esaki pa haña un otro; kiko mi tin ku hasi?

Normalmente no ta eksistí e opshon pa kambia un parsela pa un otro. Solamente si e situashon di un parsela ku a keda emití no ta permití realisashon di e meta di konstrukshon di kas, ta posibel pa konsiderá kambio di parsela.

2. Mi por hasi un petishon pa un tereno spesífiko?

Na e momento aki ta emití parsela segun e sekuensia di e lista di espera. Den kaso ku durante di e proseso di emishon di tereno, indiká preferensha pa un parsela spesífiko, por purba tene kuenta ku esaki i purba investigá kiko e posibilidatnan ta. Domeinbeheer no ta garantisá ku e petishonario ta haña e parsela spesífiko ku el a pidi p’e na momentu di emishon.

3. Kiko mi tin ku hasi pa mi sa status di mi petishon?

Pa sa status di petishon, por tuma kontakto ku empleadonan di Sentro di Servisio. Alabes klientenan di Domeinbeheer por konsultá esaki den forma digital, ora log in riba wèpsait, hasiendo uso di un kuenta personal, en kombinashon ku un kódigo sekreto.

4. Kiko ta e diferensha entre un tereno di èrfpagt i tereno di hür?

Un tereno di èrfpagt ta un tereno ku a keda emití a base di un kòntrakt di èrfpagt. Èrfpagt ta un derecho real riba kual por establesé un derecho di hipotek. Ta posibel pa bende i traspasá un tereno di èrfpagt, bou di sierto kondishon.

Un tereno di hür ta un tereno ku a keda emití a base di un kòntrakt di hür pa un periodo máksimo di 5 aña, ku posibilidat despues di pidi prolongá e kòntrakt. Hür ta un derecho personal riba kual no ta posibel establesé un derecho di hipotek. No ta posibel tampoko pa bende i traspasá un tereno di hür.

5. Si mi a kumpra un kas riba un tereno di hür, e tereno ta bira outomátikamente di mi?

Nò, esei no ta e kaso. Mester drenta den kontakto ku Domeinbeheer pa kana e proseso pa rekonosé e kambio di nòmber.

6. Kiko mi mester hasi si mi ke sples un tereno?

Promé ta rekomendabel pa bai Sentro di Servisio di Domeinbeheer pa un splikashon mas profundo i un evaluashon di e splesmentu ku ke realisá. Despues, dependiente di e tamaño i e lokalidat/destinashon di e parsela, por duna un opinion riba e petishon pa sples e parsela.

7. Kiko ta e prosedura pa kambia un tereno di hür den un tereno di èrfpagt?

E prosedura ta ku mester hasi un petishon na Domeinbeheer i entregá e dokumentonan nesesario, manera e kòntrakt di hür i kopia di prueba di identidat (sédula òf pasport). Na Sentro di Servisio di Domeinbeheer ta saka kopia di esaki.

E prosedura aki no ta aplikabel pa terenonan ku ta destiná pa uso agrario.

8. Kiko mi mester hasi pa pone un tereno riba nòmber di un otro persona?

Pa pone un tereno riba nòmber di un otro persona mester drenta den kontakto ku Sentro di Servisio di Domeinbeheer pa por evaluá e petishon. Lo establesé ta den kua forma mester emití e tereno, esta komo tereno di èrfpagt òf komo tereno di hür. Na Sentro di Servisio lo brinda tambe un splikashon kompleto di e proseso.

9. Kiko mi mester hasi pa mi renobá mi kòntrakt di èrfpagt?

Pa renobá un kòntrakt di èrfpagt mester drenta den kontakto ku Sentro di Servisio di Domeinbeheer pa hasi un petishon di prolongashon di uzo di tereno di Gobièrnu. Domeinbeheer mes tambe por inisiá e proseso.

10. Mi por bende un konstrukshon riba tereno di èrfpagt?

Si esaki ta posibel via di notario.