KANSELASHON DI ÈRFPAGT

Kanselashon di èrfpagt ta nifiká ku e doño di e terenonan, den e kaso aki Gobièrnu, ta kanselá e akuerdo di èrfpagt ku un persona (hurídiko). Esaki por sosodé den kaso ku e persona (hurídiko) no kumpli ku e akuerdonan di èrfpagt.

Dikon kanselashon?

Gobièrnu por kuminsá e prosedura di kanselashon. Esaki por, entre otro, den e siguiente kasonan:

  1. Bo a risibí un parsela den èrfpagt, pero bo no a kuminsá traha e kas den 6 luna òf bo no a kaba di traha e kas den 2
  2. Sin e pèrmit rekerí bo a duna e tereno un otro destina­shon for di loke a palabrá i duna bo e den èrfpagt
  3. Bo no a kumpli ku bo obligashon di pago di e kanòn di èrfpagt.

Kiko ta e prosedura di kanselashon?

Bo ta risibí un karta sertifiká (aangetekend) di Domeinbeheer den kua, bou di menshon di e motibu, ta informá bo tokante finalisashon di e derechi di èrfpagt.

Na mes momentu bo ta haña oportunidat pa bo kumpli ku bo obligashonnan den un periodo kòrtiku. Si akaso bo no reakshoná riba esaki, bo ta risibí un di dos karta sertifiká ku e intenshon di kanselashon.

Despues ku e término stipulá den e promé karta vense, Domeinbeheer lo kontinuá e proseso di kanselashon di forma hurídiko. Den e kaso aki un findishi lo tuma lugá di e derechi di èrfpagt ku e ophetonan ku ta riba e parsela.

E proseso di kanselashon lo tèrminá den kaso ku bo elimi­ná e motibu di e kanselashon. Den kaso di un retra­so di pago por ehèmpel, esaki ta e kaso ora ku paga e fakturanan habrí.

Si akaso bo no ta di akuerdo ku e intenshon di kansela­shon, bo por entregá un karta di opheshon na Sentro di Servisio di Domeinbeheer.

Kiko ta e kostonan?

Den kaso di kanselashon Gobièrnu lo por kobra bo kostonan di notario, abogado i limpiamentu di e tereno.

PREGUNTANAN FREKUENTE:

Mi tin un tereno di èrfpagt, pero mi no ta bai konstruí mas riba dje. Mi mester kanselá e èrfpagt?

Si, bo por tèrminá e akuerdo di èrfpagt dor di entregá un petishon na Sentro di Servisio di Domeinbeheer i entregá e derechi di èrfpagt na Gobièrnu. Na momentu ku entregá e derechi di èrfpagt bèk, bo mester kumpli sí ku bo obligashonnan di pago ku ta pendiente ainda, i tambe kostonan di notario.

Mester registrá tèrminashon di e término di èrfpagt den Registro Públiko (Kadaster). Esaki tin konsekuensianan finansiero.

DOKUMENTONAN NESESARIO

Sierto dokumento ta nesesario pa atendé kada kaso. Den e kaso aki, e dokumentonan ku sigur ta nesesario ta:

  • Formulario di petishon (tuma i yena esaki na Sentro di Servisio di Domeinbeheer)
  • Bo sédula òf pasport válido (na Sentro di Servisio di Domeinbeheer ta saka kopia di esaki)
  • Stampia di 10 florin
  • Akta di notario

Tene kuenta ku ta posibel ku den sierto kaso spesífiko tin mester di dokumento adishonal.