Okupashon Ilegal i Mantenshon di Òrdu

Okupashon ilegal di tereno di Gobièrnu ta ora un persona òf instansia ta okupá tereno di Gobièrnu sin ku e tin derechi legal pa hasi esaki. Un derechi legal por ta derechi di èrfpagt òf un kòntrakt di hür.

Ta okupá tereno di Gobièrnu den forma ilegal pa diferente meta:

• lanta konstrukshon pa bibienda òf pa uso komersial
• koba greis òf otro materia prima
• kue awa pa por ehèmpel usa den pisina
• basha sushi stail di landfill
• dèmpelmentu di laman òf konstruí pir
• pa kultivo i plantashon
• pone kònteiner/ kiosko òf otro opheto riba e tereno
• pone bòrchi òf otro opheto di propaganda riba e tereno

Okupashon ilegal ta algu sumamente serio, ku konsekuensia serio pa pueblo. Tereno di Gobièrnu ta tereno di pueblo, i e persona ku okupá tereno di Gobièrnu den forma ilegal, a perhudiká pueblo, i asta su mes!

• E aktitut aki ta kastigabel i hustisia por persiguí esun ku hasié
• Pueblo ta pèrdè su propiedat
• Si tin falta di kòntròl ta baha norma i balor di pueblo, pasobra aktitut malu ta parse aseptá
• No ta kumpli ku EOP (Eilandelijk Ontwikkelingsplan) ku konsekuensia negativo
• Ta stroba desaroyo ekonómiko i desaroyo di plannan pa traha kas
• Lista di espera pa tereno na Domeinbeheer ta kana skeins i ta resultá den desigualdat
• Siudat i bario ta haña mal struktura
• Desaroyo di tereno ta bai den forma deskontrolá
• Repartishon di tereno ta bai den forma ku no ta kumbiní
• Trahamentu di kaya, ponementu di pipa pa awa, koriente i telekomunikashon ta bira mas karu
• No por hasi trabounan di mantenshon di infrastruktura
• Gobièrnu ta pèrdè di kobra èrfpagt i impuesto pa tereno
• Kòrsou ta bira un pais sushi i a-higiéniko, ku mas chèns riba malesa

Minister di Tráfiko, Transporte i Planifikashon Urbano a hala un liña (‘nulmeting’). A introdusí un maneho nobo i no ta tolerá okupashon ilegal mas. E maneho nobo aki di Sero Toleransia ta enserá ku ta tuma medida di òrdu den kaso di okupashon ilegal. Pues:

1. ta stòp okupashon ilegal eksistente òf ta formalisá esaki den kuadro di posibilidatnan di lei, regulashon i maneho
2. ta tuma medida kontra kasonan nobo di okupashon ilegal

Ademas ku mester stòp di okupá tereno di Gobièrnu ilegalmente, mester stòp tambe tur konstrukshon riba e terenonan aki ya komo no tin pèrmit pa konstrukshon tampoko. Gobièrnu no ta tolerá ni formalisá konstrukshon nobo, esta konstrukshon despues di e asina yamá ‘nulmeting’. Kasonan eksistente, esta kasonan promé ku e ‘nulmeting’ so lo por bin na remarke pa formalisashon.

Prosedura di mantenshon di òrdu

Asina konstatá kaso di okupashon ilegal, inmediatamente ta pone bòrchi pa indiká ku mester stòp tur aktividat i trese e tereno den su forma original bèk. Ademas, asina a determiná ta ken ta e persona òf organisashon responsabel, ta manda karta p’e tambe. Si apesar di bòrchi (i karta), esun responsabel no stòp, Gobièrnu por basha e konstrukshon abou. Di e forma aki Domeinbeheer lo por duna e terenonan aki na esnan ku hasi petishon na Domeinbeheer pa legalmente bini na remarke pa haña tereno di Gobièrnu.

Mèldu

Bo sa di kaso di okupashon ilegal? Mèldu esaki na 0800-1919.